2025 жыл елімізде «Жұмысшы мамандықтар жылы» деп жарияланып, адал еңбек иелерінің қоғамдағы рөліне ерекше мән беріліп отыр. Осы ретте біз “Оқжетпес” шипажайында ұзақ жылдар бойы талмай еңбек етіп жүрген, аула тазалығы мен тәртібіне жауапты қызметкеріміз - Жанат Мұстафин туралы әңгімелемекпіз.
Жанат Мұстафин 2016 жылдан бері “Оқжетпес” шипажайының аумағын таза ұстауға, көрікті күйде сақтауға атсалысып келеді. Ол — осы мекеменің ең сенімді және еңбексүйгіш мамандарының бірі. Қарапайым, бірақ аса маңызды қызметті мінсіз атқарып жүрген Жанат ағаның еңбегі – шипажай аумағының әсем келбетінің кепілі десек, артық айтқандық емес.
Таң шапағы атпай тұрып, күнделікті жұмысын бастап кететін Жанат Мұстафин гүлзарларды ретке келтіріп, жаяу жүргінші жолдарын тазалап, демалушылар үшін жайлы әрі таза орта қалыптастыруға үлес қосып келеді. Оның тынымсыз еңбегі мен жауапкершілігінің арқасында “Оқжетпес” шипажайы жыл сайын келушілерді әдемі табиғатымен ғана емес, мінсіз тазалығымен де қарсы алады.
Жанат ағаның еңбек жолы тек аула тазалаумен шектелмейді. Бұған дейін ол құрылыс бөлімінде жұмыс істеп, күзетші және инженерлік-шаруашылық қызметтерде де өзін көрсете білді. Түрлі салада жинаған тәжірибесі мен еңбекқорлығы оны ұжым ішінде ерекше құрметке бөлеп отыр. Екі қыз бен бір ұлдың әкесі Жанат мырза үйінде де тазалықты ерекше қадағалап, оны балаларына баулып жүр.
“Шипажайдың аумағы — менің жауапкершілігім. Демалушылар жайлы жағдайда жүргенін көргенде, еңбегімнің зая кетпегенін түсінемін. Аула таза болса — көңіл таза", - дейді Жанат Мұстафин.
«Оқжетпес» шипажайының ұжымы Жанат Мұстафинді мақтан тұтады. Ол — нағыз еңбек адамы, жұмысшы мамандықтарының абыройын асқақтататын жан. Осындай еңбек адамдарын дәріптеу — болашақ ұрпаққа берілетін үлкен тәрбие.
